~ انا بلاستيك؟ إنتة بلاستيك

يعني في الواقع إنو الموضوع وصل لدرجة من التعقيد لا يمكن السكوت عنها بحيث إنو الواحد بطل يقدر يروح عالمطبخ بدون ما يتعرقل بشي سيارة أو شاشة كمبيوتر أو ديناصور وبعدين بيجي أخينا بقولك أنا بلاستيك! أنا بلاستيك؟ إنتة بلاستيك.

اوكي ولكن السؤال اللي بيطرح نفسو هوة: ما هي العلاقة الخفية بين الخضراوات ومحاولات الدجاج للسيطرة على العالم؟ هل إنو الإنسان بعاني من عقدة نقص مكبوتة تجاه الخضار ومشتقاتها أم إنو في نوع من الحساسية المفرطة من قبل بعض الناس لدغدغات ذبابة الفاكهة؟ وهل إنو العولمة فعلا انبثقت من البسكليت؟ هاي كلها أسئلة منطقية لازم نجاوب عنها قبل ما توقع الفاس بالراس ونصير نتحسر ونتقول يا ريت ما نزلنا عالبحر الميت في فصل الشتا وأكلنا برد وفلوزنا لأنو بصراحة المرض مو كويس والصحة نعمة، والله نعمة يا عمي ليش الحكي.

القصة بسيطة وبا بدها مفهومية، ليش بتعتقدوا إنو الناس اخترعو الويكيبيديا؟ لمصلحة البشر؟ لأ طبعا! للسيطرة على العالم وأنا متأكد إنو جاك باور إلو علاقة بالموضوع يا إما من قريب يا إما من بعيد لسة مش عارف بصراحة، بس على كل حال البني آدم مش لازم يصيبو اليأس والإحباط حتى ولو كان فقير ومش لاقي ياكل والوضع زي العمى وصحته زي الزفت والدنيا كلها بتكرهو لأنو الحياة حلوة بس نفهمها! آه شو لكان يعني ! وعلى رأي المثل: الشرطة في خدمة الشعب. أحيانا.

بصراحة في ناس ما بتستحي على دمها، وشو يعني إزا الطابعة ما بتطبع؟ وشو يعني إزا مش ملاقي الكندرة اللي عجبتك على قياسك أو قياس رجلك؟ خربت الدنيا يعني؟ آه؟ آه؟ آه؟ آآآآه؟ أنا بقول يمكن، ممكن، جائز، لأنو افتراضية إنو احنا البشر عايشين على كوكب الأرض لوحدنا في الكون هادا افتراض غبي غبي غبي، أصلا شو احنا؟ مهو كوكب الأرض مقارنة بالكون ما بيجي قد ذرة في محيط هائل وأصغر كمان، يعني البشر عبارة عن لا شيء، مغرورين وشايفين حالنا على شو؟ وأنا بصراحة بآمن إنو في مكان ما على كوكب ما راح يكون في مخلوقات متطورة جدا وكلهم حلوين كثير زي آنجلينا جولي بس مش أحلى منها طبعا أو يمكن أحلى لأنو في بني آدمة وحدة على كوكب الأرض أحلى من آنجلينا جولي بس أكيد مش جوليا روبرتس بشكلوا التاني بتلتين إرش برمضان.

على فكرة، دئتي الكراميل؟

هادا في ناس مش عارفين إنو أنا مواليد سنة 1976 ومفكرين إنو أنا مواليد سنة 1976 ولما أحكيلهم إنو أنا مواليد سنة 1976 بيتفاجئو كأنو أنا مواليد سنة 1976 مع إني أنا فعلا مواليد سنة 1976، إشي غريب موو؟يا سيدي ما غريب إلا الشيطان، مش بيناتنا يا زلمة ولو كلها ربع ليرة! آه مهو هادا كان أيام البنزين السعودي على أساس يعني إنو أنا مش مواطن عادي زيي زيو والغلاء لاعن تلتميس تلتميسي كمان، مفكر إنو أنا مليونير بس بجب اتشنطط بالمواصلات مشان أشعر مع عامة الشعب مثلا؟

كل ما أحكيلها تيجي نهاجر على ناميبيا ونفتح بسطة سيديات هوناك ما بتقبل، شو يعني الواحد هوة ما بصير ايكون عندو تطلعات مستقبلية استعمارية احتكارية اقطاعية برجوازية ارستقراطية ؟ ولا إحنا ما بطلعلنا يعني؟ يعني نلسون مانديلا كان يقشر بطاطا في السجن ولا كان لما بدو يتعشى ينزل عند دكانة أبو علي ويلاقي الدكانة مسكرة بعدين يحمل حالو وينتعها مشى 10 كيلومتر عالسيفوي مشان يكتشف بالأخير إنو أصلا ما في عندهم سيفوي؟ فعلا شغلة بتقرف، تيجو ننزل عالعقبة وننثر الرمال ذهبا؟ انا في عندي بحسابي بالبنك حوالي 50 دينار يا ترى أكمن حبة رمال بقدر أنثرها ذهبا بهالمبلغ؟

أنا ما دخلني هوة وقع عالدرج لحالو.

والسلام عليكم ورحمة الله وإيييييه؟ وبركاته.

أكرم خزام… موسكوووووووووووووووووووووووووو